Хөдөө аж ахуйн яамыг хөдөөтэй нь ойр байлгахгүй бол хөгжихгүй, хэмээн смарт төлөвлөгөөгөө танилцуулж жилийн өмнө нүүлгэж, суулгаж бужигнуулаад амжсан Ж.Энхбаяр сайд илүү том бялуу хүртэхээр “Эдийн засгийн хөгжлийн сайд болоод гараад өглөө. Түүний оронд “Хөдөө өссөн туршлагатай” хэмээн хөдөөний хүний маанагдуухан тайлбар өгсөн М.Бадамсүрэн гишүүн сайд болонгуутаа л яамаа буцааж хотод нүүлгэх тухай яриад эхлэв. Хамгийн хачирхалтай нь Ж.Энхбаяр сайд энэ талаар үсэг ч дуугарсангүй таг чиг байх нь олон түмний гайхшийг барлаа. “Буцах бэрд үхэр тугал нийлэх нь хамаагүй” гэдэг нь л энэ байх. Тус яамны 70 хувийг нүүлгэж тэнд ажиллаж байсан олон зуун хүний амьдралыг бужигнуулаад, нүүж чадахгүй хэсгийг  нь  ажилгүй болгосон. Улсын төсвөөс 2,4  тэрбумын зардал  гаргаж дөнгөсөн Ж.Энхбаяр сайдад өчүүхэн ч гэсэн ёс зүй байсан бол санаачилсан ажлаа үр дүнд хүртэл хэдэн жилийг зарцуулах байв.

Нэгэн цагт ЖДҮ сангаас зээл авч, 950 саяар хувийн бизнесээ төвхнүүлээд амжсан Ж.Энхбаяр сайдад төсвийн мөнгийг тэрбум тэрбумаар нь гарын салаагаар урсгах нь юу ч биш  бололтой. Хэрэв тус  яам хотод эргэн нүүж ирэх дээрээ тулбал дахин 2,4 тэрбум төгрөг яригдаж эхэлнэ. Нийтдээ 5 тэрбум дөхөх энэхүү зардлыг Ж.Энхбаяр сайдаас өөрөөс нь гаргуулья.  Чухамдаа  генералын хүү учир цэргийн хүмүүжлээр өсч, хатуу зарчимч төлөвшлөөр “Монгол улсынхаа төлөө зүтгэнэ” хэмээн сурталчилж, улстөрийн имижээ бүрдүүлж ирсэн Жадамба генералын хүүд улс орны эдийн засгаа бодох сэтгэл түй  ч байхгүй гэдгийг дээрх  явдлуудаас харж  болохоор байна.